Вы читаете тему: Канон о здравии

 Заголовок сообщения: Канон о здравии
СообщениеДобавлено: 15 янв 2013, 01:30 
Аватара пользователя

Автор Темы

Молитвами святых отец наших, Господи, Иисусе Христе, Боже наш, помилуй нас.
Аминь.

Слава Тебе, Боже наш, слава Тебе.

Царю Небесный, Утешителю, Душе истины, Иже везде Сый и вся исполняяй, Сокровище благих и жизни Подателю, прииди и вселися в ны и очисти ны от всякия скверны и спаси, Блаже, души наша.

Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас. Господи, очисти грехи наша. Владыко, прости беззакония наша. Святый, посети, исцели немощи наша Имени Твоего ради.

Господи, помилуй. (Трижды)
Слава, и ныне.

Отче наш! Иже еси на Небесех. Да святится Имя Твое. Да приидет Царствие Твое. Да будет воля Твоя, яко на Небеси и на земли. Хлеб наш насущный даждь нам днесь. И остави нам долги наша, якоже и мы оставляем должником нашим. И не введи нас во искушение. Но избави нас от лукавого.

Господи, Иисусе Христе, Сыне Божий, помилуй нас. Аминь.

Господи, помилуй, 12 раз.
Слава, и ныне.

Приидите, поклонимся Цареви нашему Богу. 
Приидите, поклонимся и припадем Христу, Цареви нашему Богу. 
Приидите, поклонимся и припадем Самому Христу, Цареви и Богу нашему.

И псалом 70-й:

На Тя, Господи, уповах, да не постыжуся в век. Правдою Твоею избави мя и изми мя, приклони ко мне ухо Твое и спаси мя. Буди ми в Бога защитителя и в место крепко спасти мя, яко утверждение мое и прибежище мое еси Ты. Боже мой, избави мя из руки грешнаго, из руки законопреступнаго и обидящаго, яко Ты еси терпение мое, Господи, Господи, упование мое от юности моея. В Тебе утвердихся от утробы, от чрева матере моея Ты еси мой покровитель: о Тебе пение мое выну. Яко чудо бых многим, и Ты помощник мой крепок. Да исполнятся уста моя хваления, яко да воспою славу Твою, весь день великолепие Твое. Не отвержи мене во время старости, внегда оскудевати крепости моей, не остави мене. Яко реша врази мои мне, и стрегущии душу мою совещаша вкупе, глаголюще: Бог оставил есть eго, пожените и имите eго, яко несть избавляяй. Боже мой, не удалися от мене, Боже мой, в помощь мою вонми. Да постыдятся и исчезнут оклеветающии душу мою, да облекутся в студ и срам ищущии злая мне. Аз же всегда возуповаю на Тя и приложу на всяку похвалу Твою. Уста моя возвестят правду Твою, весь день спасение Твое, яко не познах книжная. Вниду в силе Господни; Господи, помяну правду Тебе единаго. Боже мой, имже научил мя еси от юности моея, и до ныне возвещу чудеса Твоя, и даже до старости и престарения, Боже мой, не остави мене, дондеже возвещу мышцу Твою роду всему грядущему, силу Твою и правду Твою, Боже, даже до вышних, яже сотворил ми еси величия. Боже, кто подобен Тебе Елики явил ми еси скорби многи и злы, и обращься оживотворил мя еси, и от бездн земли возвел мя еси. Умножил еси на мне величествие Твое, и обращься утешил мя еси, и от бездн земли паки возвел мя еси. Ибо аз исповемся Тебе в людех, Господи, в сосудех псаломских истину Твою, Боже, воспою Тебе в гуслех, Святый Израилев. Возрадуетеся устне мои, егда воспою Тебе, и душа моя, юже еси избавил. Еще же и язык мой весь день поучится правде Твоей, егда постыдятся и посрамятся ищущии злая мне.

Или псалом 142-й:

Господи, услыши молитву мою, внуши моление мое во истине Твоей, услыши мя в правде Твоей и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя, Господи, исчезе дух мой, не отврати лица Твоего от мене, и уподоблюся низходящым в ров. Слышану сотвори мне заутра милость Твою, яко на Тя уповах. Скажи мне, Господи, путь воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою. И милостию Твоею потребиши враги моя и погубиши вся стужающыя души моей, яко аз раб Твой есмь.

По псалме: Слава, и ныне.
Аллилуиа, аллилуиа, аллилуиа, слава Тебе, Боже. (Трижды)

Господи, помилуй, 12 раз.
Слава, и ныне.

И поем Бог Господь: во глас 4-й:

Бог Господь и явися нам, благословен Грядый во Имя Господне. 
Стих: Исцели мя, Господи, яко смятошася кости моя, и душа моя смятеся зело.

И тропарь, глас тойже:

Скорый в заступлении, Един Сый, Христе, скорое свыше покажи посещение страждущему рабу Твоему имя рек, и избави от недугов и лютых болезней, и воздвигни, воеже пети и славити Тя непрестанно: молитвами Богородицы, Едине Человеколюбче.

Слава: Призри милостивно, Господи, милосердным Твоим оком на смиренное наше моление, и не презрев е, человеколюбно посети болезнию одержимаго раба Твоего нами и ныне к Тебе припадающаго, и силою Твоего благосердия воздвигни его молитвами Богородицы, Едине Человеколюбче.

И ныне: Моление теплое и стено необоримая, милости Источниче, мирови прибежище, прилежно вопием Ти: Богородице Владычице, предвари, и от бед и болезней избави раба Твоего, Едина вскоре Предстательствующая.

И по сем псалом 50-й:

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебе Единому согреших, и лукавое пред Тобою сотворих, яко да оправдишися во словесех Твоих и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая: тогда возложат на олтарь Твой тельцы.

--- КАНОН, ГЛАС 3-й. ---


Песнь 1-я.

Ирмос: Пресекаемое море жезлом древле, Израиль пройде яко по пустыни, и крестообразно яве предуготовляет стези. Сего ради поим во хвалении чудному Богу нашему, яко прославися.

Стих: Господи, да не яростию Твоею обличиши мене, ниже гневом Твоим накажеши мене.
В день печали, нашедшия на ны, к Тебе, Спасе, припадающе, Твоея милости просим: облегчи болезнь раба Твоего, рцы и нам, яко и сотнику: иди, се здрав есть отрок твой.

Стих: Помилуй мя, Господи, яко немощен есмь.

Мольбы и моления приносяще, с воздыханием и верою к Тебе вопием: Сыне Божий, помилуй нас, и воздвигни от одра лежащаго, якоже разслабленнаго словом, рекий: возьми одр твой и отпущаюттися греси твои.

Слава Отцу и Сыну и Святому Духу.

Твоего, Христе, образа подобию кланяющеся, сего верою лобзаем, и болящему здравия просим, подражающе кровоточивую, яже воскрилию риз Твоих прикоснувшися, исцеление недуга прияла есть.

И ныне и присно и во веки веков. Аминь.

Пречистая Госпоже Богородице, всем известная Помощнице, не презри нас, к Тебе припадающих, но моли, яко Благая, Сына Твоего и Бога нашего подати здравие болящему, да Тя с нами прославляет.

Песнь 3-я.

Ирмос: Иже от несущих вся Приведый, словом созидаемая, совершаемая Духом, Вседержителю Вышний, в любви Твоей утверди мене.

Стих: Исцели мя, Господи, яко смятошася кости моя, и душа моя смятеся зело.
Иже от тяжких болезней на земли поверженный, к Тебе, Христе, нами вопиет: подаждь здравие телеси, якоже Езекии, плакавшуся к Тебе.

Стих: И Ты, Господи, доколе; обратися, Господи, избави душу мою.

Призри, Господи, на наше смирение, и не помяни беззаконий наших, но веры ради болящаго, яко прокаженнаго словом исцели, да Твое, Христе, Боже, славится Имя.

Слава: Церкви, Юже освятил еси, Христе, не даждь поношения, но воздвигни невидимо на одре болезни лежащаго, иже молится Тебе: да не рекут невернии, где есть Бог их.

И ныне: К Тебе, Богородице, руце воздеюще вопием: услыши рабов Твоих молитву и спаси в болезни лежащаго, да от болезни восстав, воздаст обеты, яже в печали глаголаша уста его.

По третией песни катавасия: Иже от несущих: или сия, глас 6-й:
Избави от бед рабы Твоя, Милостиве, яко вси усердно к Тебе прибегаем, Милостивому и Избавителю всех Владыце, Господу Иисусу.

Посем Господи, помилуй, 12 раз
Слава, и ныне.

Седален, глас 8-й:
Якоже древле воздвигл еси Петрову тещу, и спасл еси расслабленнаго, носима на одре, тако и ныне посети болящаго раба Твоего, Милостиве: Ты бо Един еси, Понесый недуги рода нашего, и Тебе Единаго вемы Терпеливаго и Милосердаго, и милостиваго Врача душ и телес Христа Бога нашего, наводящаго недуги и паки восставляющаго, и подавающаго прощение кающимся о согрешениих, Едине Милосерде и Всемилостиве.

Слава: Аз, грешный, плачуся на одре моем лежа, прощение подаждь, Христе Боже, грехом моим, яже от юности моея сотворих, и от болезни мя воздвигни, да славлю Тя, Единаго Всемилостиваго душ и телес Врача.

И ныне: Умилосердися, Владычице, и воздвигни мя от одра болезненнаго, крепость бо моя во мне изнеможе, и весь нечаянием одержим есмь: Мати Божия Пречистая, исцели мя, недугующаго люте, Ты бо еси Помощница христианом.

Песнь 4-я.

Ирмос: Положил еси к нам твердую любовь, Господи: Единороднаго бо Твоего Сына за ны на смерть дал еси, темже Ти зовем благодаряще: слава силе Твоей, Господи.

Cтих: Спаси мя ради милости Твоея:
Тебе, Творче, молимся, вся грехи раба Твоего прости, не хощеши бо смерти грешнаго, и оживи и уздрави его, болезнующаго, да востав, послужит Ти, исповедая с нами Твою благодать.

Стих: Яко несть в смерти поминаяй Тебе, во аде же кто исповестся Тебе:
Уже отчаяннаго лютым недугом, и к смерти приблизившагося, возврати, Христе, на живот, и даждь плачущым утешение, да вси прославляем Твоя святая чудеса.

Слава: Слезы Манассиины, Ниневитян покаяние и Давидово исповедание приим, вскоре сих спасл еси: и нашя молитвы ныне приими, Благосерде Господи: и подаждь здравие болящему, о немже Тя молим.

И ныне: Подаждь нам Твою милость, Госпоже, всегда на Тя надеющымся: и испроси здравие болящему, врачебнии Твои руце с Предтечею, Богородице, ко Христу Богу простирающи.

Песнь 5-я.


Ирмос: На земли невидимый явился еси, и человеком волею сожил еси Непостижимый, и к Тебе утренююще, воспеваем Тя, Человекелюбче.

Стих: Утрудихся воздыханием моим:
Дщерь Иаирову уже умершую, яко Бог оживил еси: и ныне возведи, Христе Боже, от врат смертных болящаго, Ты бо еси всем Путь Живота.

Стих: Измыю на всяку нощь ложе мое, слезами моими постелю мою омочу.
Сына вдовича оживив, Спасе, тоя слезы преложил еси на радость: и ныне спаси недугом тлеющаго раба Твоего, да и наша скорбь и болезнь на радость прейдет.

Слава: Огненная болезнь иногда, Христе, тещи Петрове прикосновением руки Твоея исцеле: и ныне таяжде всесильная Твоя десница да воставит болящаго раба Твоего, да востав, якоже и сия послужит Тебе.

И ныне: В скорби сущи, грешнии, и не имуще к Богу дерзновения, к Тебе, Пречистая Богомати, вопием: моли Сына Твоего, подати болящему здравие душевное же и телесное.

Песнь 6-я.

Ирмос: Бездна последняя грехов обыде мя, и исчезает дух мой: но Прострый, Владыко, высокую Твою мышцу, яко Петра мя, Управителю, спаси.

Стих: Смятеся от ярости око мое:
Бездну милости имеяй, Христе Боже, внуши моление рабов Твоих, и якоже Петром Тавифу воскресил еси, сице и ныне в болезни лежащаго воздвигни, послушав церковныя молитвенники.

Стих: Обетшах во всех вразех моих:
Врачу душ и телес наших, понесый недуги всего мира, Христе, Енеа Петром исцеливый и Евтиха Павлом воскресивый, и ныне болящаго исцели, святых Апостол молитвами.

Слава: Преложи, Христе, на радость рыдание о недужном ныне скорбящих: да Твою получивше милость, внидем в Дом Твой со обетованными дары, славяще Тя со Отцем и Духом во Едином Существе Нераздельнаго Бога.

И ныне: Приидите, о друзи, припадем к Божией Матери, Та бо имать власть недужныя исцеляти со безмездникома вкупе, духовным помазующе молитв Своих Богоприятным елеем.

По 6-й песни катавасия
Бездна последняя грехов обыде мя, и исчезает дух мой: но Прострый, Владыко, высокую Твою мышцу, яко Петра мя, Управителю, спаси.

Господи, помилуй (12 раз)
Слава, и ныне.

Абие же поют или чтут кондак, глас 3-й.
Душу мою, Господи, во гресех всяческих, безместными деяньми разслаблену воздвигни Божественным Своим человеколюбием, якоже и разслабленнаго воздвигл еси древле, да зову Ти спасаемь: Щедре Христе, даждь ми исцеление.

Икос: Иже руки Своея горстию содержай концы, Иисусе Боже, Иже Отцу собезначальный и Духу Святому совладычествуяй яко плотию, явился еси, недуги исцеляя и страсти очистил еси, слепыя просветил еси, и разслабленнаго словом Божественным совозставил еси, сего право ходяща сотворив и одр повелел еси на рамо взяти. Темже вси с ним воспеваем и поем: Щедре Христе, даждь ми исцеление.

Песнь 7-я.


Ирмос: Прежде образу златому, персидскому чтилищу отроцы не поклонишася, трие поюще посреде пещи: отцев Боже, благословен еси.

Стих: Отступите от мене,вси делающие беззаконие:
Креста Твоего, Господи, Животворнаго, Имже смерть погибе и мертвии оживотворени быша, Божественным знамением, ныне болящаго воздвигни, якоже при Елене умершую девицу.

Стих: Яко услыша Господь глас плача моего.
Долгую, Господи, и лютую болезнь Иовлю, на гноищи в червех седящаго, и благодарне молящагося словом исцелил еси: и ныне болезнующаго и нами молящагося Тебе, яко Благ, исцели невидимо, молитвами святых Твоих.

Слава: Вси вемы, яко всяко умрети нам есть, Тебе Богу тако изволившу: но на малое время, Милостиве, здравия просим болящему, премени от смерти того на живот, подаждь скорбящым утешение.

И ныне: Пособствуй и помози нашей нищете, Богородице, Ты веси время и час, когда умолити Сына Твоего и Бога нашего, подати здравие болящему и прощение всех согрешений.

Песнь 8-я.


Ирмос: Служити Живому Богу, в Вавилоне отроцы претерпевше, о мусикийских органех нерадиша, и посреде пламене стояще, боголепную песнь воспеваху, глаголюще: благословите вся дела Господня Господа.

Стих: Услыша Господь моление мое:
Наказуя наказал еси, Владыко, болезнию раба Твоего, и скоро исцели, Милостиве Христе Боже: и еще смерти не предаждь судне, да Тебе покаянием воздаст: Сам бо рекл еси: не хощу смерти грешнаго.

Стих: Господь молитву мою прият:
Господи Милостиве, Твоя преславная чудеса и до нас ныне да достигнут, бесы прожени, недуги и раны исцели, болезни уврачуй, потворы и чародеяния: и всякия язвы избави ны.

Слава: Запретивый, Христе, морским ветром, и страх учеников на радость преложивый, запрети и ныне тяжким болезнем, труждающим раба Твоего: да вси возвесeлимся, хваляще Тя во веки.

И ныне: Избави, Богородице, от обышедших нас печалей, бед же и скорбей,и всех различных недугов, отравы и чародеяний, и уроков различных человек, и напрасныя смерти, молимся.

Песнь 9-я.


Ирмос: На Синайстей горе виде Тя в купине Моисей, неопально огнь Божества заченшую во чреве: Даниил же Тя виде гору несекомую, жезл прозябший, Исайа взываше, от корене Давидова.

Стих: Да постыдятся и смятутся вси врази мои:
Источниче жизни, подателю милости, Христе, не отврати лица Твоего от нас, но облегчи болезни утружденному болезнию, и воздвигни его, якоже Фаддеом Авгаря: да присно Тебе славит, со Отцем и Духом Святым Единаго Бога.

Стих: Да возвратятся и устыдятся зело вскоре.
Евангельскому верующе глаголу , Твое ищем обещание, Христе: просите бо, рекл еси, и дастся вам: тем ныне просяще молим Тя: востави от одра здрава, лютым поверженнаго недугом: да Тя с нами вкупе величает.

Слава: Умученный недугом и внутрь невидимыми ранами Тебе, Христе, нами вопиет: не ради нас, Господи, вси бо есмы полны грехов, но Матери Твоея и Предтечи молитвами, подаждь исцеление болящему.

И ныне: Божия Мати Пречистая, со всеми святыми призываем Тя, со Ангелы и Архангелы, со пророки и патриархи, со Апостоли и святители, с преподобными и праведными, молися Христу Богу нашему, подати здравие болящему: да Тя вси величаем.

Посем:
Достойно есть: или задостойник праздника. Егда же несть праздника, можно читать задостойник сей:
Владычице, приими молитвы раб Твоих, и избави нас от всякия нужды и печали, Ты еси, Богородице, оружие наше и Стена, Ты еси Заступница, и к Тебе прибегаем, Тя и ныне на молитву призываем, да избавиши нас от врагов наших, Возвеличим Тя вси, Всенепорочную Матерь Христа Бога, Юже осени Дух Пресвятый.

Посем:
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас. Господи, очисти грехи наша. Владыко, прости беззакония наша. Святый, посети, исцели немощи наша Имени Твоего ради.

Господи, помилуй. (Трижды)
Слава, и ныне.

Отче наш! Иже еси на Небесех. Да святится Имя Твое. Да приидет Царствие Твое. Да будет воля Твоя, яко на Небеси и на земли. Хлеб наш насущный даждь нам днесь. И остави нам долги наша, якоже и мы оставляем должником нашим. И не введи нас во искушение. Но избави нас от лукавого.

Господи, Иисусе Христе, Сыне Божий, помилуй нас. Аминь.

И тропари сия, глас 6-й:
Помилуй нас, Господи, помилуй нас, всякаго бо ответа недоумеюще, сию Ти молитву, яко Владыце, грешнии приносим, помилуй нас.

Слава: Господи, помилуй нас, на Тя бо уповахом, не прогневайся на ны зело, ниже помяни беззаконий наших, но призри ныне, яко Благоутробен, и избави нас от враг наших, Ты бо еси Бог наш, и мы людие Твои, вси дела руку Твоею, и Имя Твое призываем.

И ныне: Милосердия двери отверзи нам, Благословенная Богородице, надеющеся на Тя, да не погибнем, но да избавимся Тобою от бед, Ты бо еси Спасение рода христианскаго.

Посем: Господи, помилуй. 40 раз.

И молитву сию, юже глаголем колена преклонше, со всяким вниманием и умилением:

Боже и Господи сил, милостию строяй вся на спасение роду человеческому, посети и раба Твоего имя рек, нарицающаго Имя Христа Твоего, и исцели его от всякаго греха плотскаго и душевнаго, и от всякаго соблазнения и напасти, и всякое нашествие неприязненно далече сотвори от раба Твоего, и воздвигни его от одра болезненнаго, и устрой его ко Святей Твоей Церкви, здрава душею и телом, украшенна делы добрыми и словесы благими, славяща Тя со всеми и Христа Твоего, Упования нашего, с Нимже Благословен еси, и со Пресвятым и Благим и Животворящим Твоим Духом, ныне и присно и во веки веков. Аминь.

Абие же востав, творим отпуст, глаголюще:

Честнейшую Херувим:
Слава Отцу и Сыну и Святому Духу, и ныне и присно и во веки веков. Aминь.

Господи, помилуй (трижды).
Господи, благослови.

И отпуст: Господи, Иисусе Христе, Боже наш, молитв ради Пречистыя Твоея Матере, святаго славнаго пророка, Предтечи и Крестителя Иоанна, святых славных и всехвальных Апостол, святаго великомученика и целителя Пантелеимона и святых безмездных врачев Космы и Дамиана и всех святых Твоих, помилуй и спаси нас и раба Твоего имя рек яко Благ и Человеколюбец.
Аминь.

Посем же, аще изволят, поют или чтут сей тропарь, глас 4-й:

Призри на моления Твоих раб, Всенепорочная, утолящи лютая на ны востания, всякия скорби нас изменяющи. Тя бо Едину, твердое и известное Утверждение имамы, и Твое предстательство стяжахом, да не постыдимся, Владычице, Тя призывающии, потщися на умоление Тебе верно вопиющих: радуйся, Владычице, всех Помоще, Радосте и Покрове, и Спасение душ наших.

И отходят во своя си, благодаряще Бога.


Тому, кто научился слушать, Господь даёт способность говорить...



  
 
Сообщение оценили:
galamakid, Димитр
Показать сообщения за:  Поле сортировки  
Страница 1 из 1   [ 1 сообщение ]



Кто сейчас на конференции

Сейчас этот форум просматривают: нет зарегистрированных пользователей и гости: 1


Вы не можете начинать темы
Вы не можете отвечать на сообщения
Вы не можете редактировать свои сообщения
Вы не можете удалять свои сообщения
Вы не можете добавлять вложения

Выберите действие

Начать новую тему
Страница 1 из 1   [ 1 сообщение ]

      

Перейти:  
Яндекс.Метрика


Powered by phpBB © 2000, 2002, 2005, 2007 phpBB Group
610nm Style by Daniel St. Jules of Gamexe.net
Copyright © Aiwan. Kolobok smiles
Вы можете создать форум бесплатно PHPBB3 на Getbb.Ru, Также возможно сделать готовый форум PHPBB2 на Mybb2.ru
Русская поддержка phpBB